Eth Plen der Ajuntament de Bossòst a aprovat iniciaument eth Document Unic de Proteccion Civiu Municipau (DUPROCIM), er esturment que definís era organizacion e es procediments d’actuacion deth municipi deuant de possibles situacions de risc o emergéncia.
Eth document analise es principaus risques que pòden afectar a Bossòst, entre eri es incendis forestaus, es inondacions, es nheuades, es lauegi, eth risc seismic, es episòdis de vent e eth risc quimic, e determine era estructura municipau necessària entà hèr-i front.
Eth DUPROCIM establís qui assumís era direccion e coordinacion d’ua emergéncia, coma se receben e transmeten es avisi, coma se mobilizen es diferenti responsables municipaus e de quina manèra se coordine er Ajuntament damb es servicis d’emergéncia e es organismes competents.
Tanben includís es fiches d’actuacion des responsables, eth directòri de comunicacions, es mejans e recorsi disponibles e era cartografia des diferenti risques. Era sua finalitat ei dispausar d’ua responsa municipau prealablament organizada que permete actuar, informar e protegir ara poblacion de manèra coordinada deuant d’ua emergéncia.
Era aprobacion iniciau represente un prumèr pas laguens dera tramitacion deth document. Un còp completadi es tramits corresponents, se contunharà eth procediment enquiara sua aprobacion definitiva.
Era elaboracion deth DUPROCIM de Bossòst a compdat damb eth supòrt economic dera Deputacion de Lhèida, en marc des ajudes destinades as municipis entà actuacions en matèria de proteccion civiu.
Damb aguest esturment, er Ajuntament de Bossòst auance ena planificacion dera proteccion civiu municipau e refòrce era sua capacitat de prevencion, coordinacion e responsa deuant de possibles emergéncies.
